Lombardia Granda l è on Assoziazion politega che, de cordi cont el Statuu, la gh à coma fin fondamental e sgeneral la defensa, el recovrà e l emazipazion de l identitaa granlombarda.
L Assoziazion la nass a Pavia, capitala morala granlombarda e antega capitala de l Ream Langobard, ind el 6 November 2013 per meret de l bergomasch Pol Sizz, de l sevares Adalbert Ronchee, de l paves Achill Beltramm, de l carnegh Ludovic Colomba e de l vogheres Lissandar Poeugg.
El nost viasg el comenza tempo indree: per el lavor de Sizz e Ronchee, tra el 2009 e el 2010 l è fada insemma la Weltanschauung nazionalista etnega razionala che, aplicada a l contest de la Lombardia, la dà orisgin a quell che numm ciamom Lombardesem.
Cont l idea de spantegà mei i temategh de l Lombardesem e giontà insemma i identitee che i condividen, ind el 2011 l è inscii nassuu el Movement Nazionalist Lombard.
Quan che el Movement Nazionalist Lombard el comenza el sò lavor de informazion e sensibilizazion in tra i Lombard, ind el sò dent el nass on proficuo debatt che el menna a l ipotesis de slargà el Lombardesem de l ambet territorrial de la Lombardia storega-lenghistega a i territorri che inn etnegament lombard ma l inn mia (pu) lenghistegament, idest Trent, Verona, Vizenza, Bellun e Friul.
La Lombardia lenghistega, per quant larga, la sariss stada defaa parziala e privada de la sò part de l zenter-Est la sariss restada quaicoss de mia natural: gh evom inscii de figní el lavor de unificazion lombarda taccada d i Viscont e ginotà finalment Neustria e Austria.
Poeu vegh vardaa che Movement Nazionalist Lombard l eva on nomm assee longh e poeugh inzisiv, emm inscii deziduu che l eva nezessari fà su on noeuv sosgett che l gh eva a l zenter d i sò azion l intrega Lombardia etnega e che l gh eva on nomm bon de comunegà in manera ladina quest nost obiettiv chi.
Che nomm mei inscii de Lombardia Granda?
Con la nassuda de Lombardia Granda a Pavia, el Lombardesem l aa inscii troeuvaa el sò sit natural in quella che l eva vegnida on idea ben netta: slargà el vardà e l azion versa el nost Est.
Numm emm faa la nosta dezision: ghe semm mettuu adree, emm mettuu la fascia e semm vegnuu giò in camp per battasgià affiondament contra i velen che inn adree a fà foeura la Lombardia e la soa auto-determinazion.
Chi el se parla mia de Taia, Padania, Lombard-Venet, Svizzera slargaa o olter vaccaa, ma domaa de Lombardia, quella vera e genuina, la Lombardia Granda.
Numm Granlombard semm ona Nazion, ma domaa se ghe redescovrom inscii numm gh aremm la nosta libertaa.
Proeuppi quest chi l è quell che num Lombardist voeurom: ommen e donn Lombard meritant de vegh on doman, on staa libber che el podariss representai perchè affrancaa de la mentalitaa taiana e sgiacobina desgià de dess.
L indipendenza la gh à de vess conquistada pass poeu pass cont pazienza, passion, perseveranza, senza smargiassaa e impromettuu che inn poeu mai mantegnuu.
El gh è quaicoss de sossenn important de fà primma d i struzzi per vess libber politegament: tornà a vess pardon de numm istess, de la nosta conscenza lombarda.
E ti, Lombard, ‘sa te voeuret fà?
Restà svaccaa e segutà a rangognà senza cambià nagott o taccà a datt de fà in manera seria e giontass a numm per fà nà mei la situazion e convertì i tò, i nost Compatriott?
Te see cont la Lombardia toa Nazion o contra de Lee?
In olter paroll, te see cont ti o contra de ti?
