Art. 1 – Finalitaa
L Assoziazion politega “Lombardia Granda” la gh à coma finalitaa fondamentala e generala la defensa, el recovrà e l emanzipazion de l identitaa granlombarda. Per ruvà a toeu quii finalitaa chi, l è competenza de l Consei la programmazion ind i detai d i attivitaa de fà.
Art. 2 – Assoziaa
L adesion a l Assoziazion la poeud vess rezeduda a l Consei de tucc i personn fisegh che ne partasgen i obiettiv e aproven senza condizion quest Statuu chi. L ammission, o el refus, l è aprovada de l Consei e comunegada a l candidaa in manch de tri mes. I Assoziaa gh ann l obligazion de fà i contribuzion stabilii de l Consei, de partezipà attivament a la vita assoziativa e de tegnì on comportament coverent a i finalitaa assoziativ. L’ammission l è a temp indeterminaa, cont el ciar dritt de annulazion. I contribuzion assoziativ inn mia trasmissibel, cont l eccezion d i trasferiment per mort, e inn mia revalutabel. El rol de Assoziaa el se poeud perd per: mort, dimission volontari, decadenza, espulsion. La fin de la relazion assoziativa l implica mia liquidazion in favoo de l ex Assoziaa o d i sò eree.
Art. 3 – Economia
I attivitaa assoziativ inn finanzaa de: contribuzion d i Assoziaa, contribuzion de privaa e de tucc i entraa consentii de la lesg. El period de attivitaa l è longh on ann e el corespond a l ann solee. El Consei el gh à l obbligazion de mett giò e aprovà per tucc i period de attivitaa on report economegh-finanzee di attivitaa associativ. L è de l tutt interdii distribuì, anca indirettament, utel o avanz de sgestion inscii coma fond, reserv o capital, al manch che la destinazion o la distribuzion inn mia imponnuu de la lesg.
Art. 4 – Orghen de l Assoziazion
I Orghen de l Assoziazion inn: l Assemblea, el Consei, el President.
Art. 5 – L Assemblea
L Assemblea l è el orghen soran de l Assoziazion e el è faa de tucc i Assoziaa, che gh ann paritaa de vod. L Assemblea l è ciamada de l President, cont notizia collettiva cont i reson d i lavor de scriv al manch des dì primma de quell scernii per l inconter, in manera ordinaria sciasch duu agn e in manera estraordinaria quan che l è rezeduu de al manch la metaa d i member de l Consei o on quart d i Assoziaa. L Assemblea l è mettuda insemma in manera regolara se, in primma ciamada, la gh è almanch la metaa d i Assoziaa. In seconda ciamada, l è regolara cont al manch on quart d i Assoziaa. In tucc e duu i manee, tucc i dezision inn ciappaa cont la masgioranza relativa d i member che voden. I discussion e i dezision de l Assemblea inn ressumaa ind on report, faa de l Segretee e firmaa de l President, che tucc i Assoziaa gh ann el dritt de vardà.
Art. 6 – El Consei
El Consei el dezid l azion generala de l Assoziazion e ne eserza l ordinaria e l estraordinaria sgestion. El poeud delegà i sò dritt, ma resten de competenza esclusiva de l Consei: aprovà el budget e el balanz; redefinì i contibuzion d i Assoziaa; dezid l espulsion d i Assoziaa; aprovà, modifegà e intregà i regolament intern; vardà eventuai rezeduu de re-ammission. El Consei l è faa d on minem de tri a on massem de sett member scernii de la Assemblea in tra i sò partezipant. El resta in offizi duu agn o pura per el minoo period determinaa de la antizipada convocazion de l Assemblea per concomitant dimission de la masgioranza assoluda d i sò member. El Consei el s incontra in su ciamada de l President, che el presetta, al manch ona voeulta sciasch tri mes, o anca tucc i voeult che el è rezeduu de la masgioranza assoluda d i sò member. I dezision inn ciappaa cont masgioranza relativa e cont la presenza de la metaa d i sò member. In cas de paritaa de vod, quell de l President el var dobbi.
Art. 7 – El President
El President el rappresenta legalment l Assoziazion in front d i terz part e in scrima. El ciama e el presetta l Assemblea e el Consei e el finiss foeura i dezision de quist. L è scernii in tra i member de l Consei e el resta in offizi coma el Consei medesimm. El Consei el nommena e el revoca on Segretee in tra i sò member, che el ciappa i funzion del President quan che l è momentanament impedii. Per dimission, impediment permanent o mort, i sò funzion inn faa de l Segretee fina a quan che el Consei, che el s incontrarà in manch de trenta dì de l event, vodarà el noeuv President.
Art. 8 – Controll
L Assemblea la poeud dezid l annulament o la modificazion de singol att ciappaa de l President o de l Consei in ciar contrast cont el present Statuu o d i interess de la Assoziazion. Ind el cas de violazion particolarment grev, l Assemblea la poed decretà el disligament de l orghen consideraa e la nommena d on Commissee cont i funzion de l orghen sostituii.
El Consei gh à l incaregh de vardà in su la compliance de l Statuu de part d i Assoziaa e in sul lor comportament. L Assoziaa che el respetta mia i sò oblegh l gh à de vess deferii al Consei, che el segutarà a la verifega d i faa, a l eventuala odizion de l deferii e a l prozess. I sanzion aplicabel inn: la reciamanda scrivuda; la sospension; l espulsion.
Art. 9 – Modifega, correzion e interpretazion
La modifega de l present Statuu la poeud vess proponnuda de l Consei o de al manch on quart d i Assoziaa e deliberada de la Assemblea, ordinaria o estraordinaria, cont la masgioranza assoluta de almanch tri quart d i Assoziaa. El Consei el poeud coresg eventuai eror materiai o defett de coordinament in tra i articol de l present Statuu, o anca inserì disposizion de lesg. El Consei l è competent a emanà norm interpretativ otentegh de l present Statuu.
Art. 10 – Disligament de l Assoziazion
El disligament de l Assoziazion el poeud vess deziduu de l Assemblea, ordinaria o estraordinaria, cont la masgioranza assoluda d i tri quart d i Assoziaa. In tucc i cas, gh è l oblegh de dà el patrimoni a oltra assoziazion cont finalitaa arent o a fin de publega utilitaa, sentii l organism de controll ex art. 3 comma 190, de la Lesg 23 dezember 1996, n° 662 e a manch de diversa destinazion imponnuda de la lesg.
Art. 11 – Disposizion finai
Per quell che l è mia espressament scrivuu in quest Statuu chi s applichen i disposizion consideraa de l codes zivil taian e d i olter lesg aplicabel.
