Vunn d i simboi pussee rappresentativ, se mia el pussee rappresentativ, de la Lombardia l è de seguu el Bisson d i Viscont, i radis d el che inn in d la storria de Milan e de la Lombardia istessa.
El Bisson el rappresenta on simbol de terra, mitològegh, infolzii de significaa che poeudarissen vess mettuu in commun cont quell d el basilisch, ona bestia mitega, recorrenta fess in d i cuntà de l Età de Mezz, a el che el vegniva daa el poeud de copà domà cont el proeuppi vard oppura cont el sò fiaa pestifer.
A quest propòsett chi, vidom el Dragh Tarantasi, on monster che seconda la leggenda l infestava i aicch d el arsuaa Lagh Gerond , situaa in quella che incoeu l è la Gera d Adda, arent el limett tra el Milanes e el Berghemasch; questa figura chi la se reconnett a quella d i olter cuntà su d el mond zeltegh (i dragh defaa) a el che el vegniva attribuii el poeud mortal de mazzà cont el fiaa velenos, proeuppi come el grechizzaa basilisch. El par utel regoeurdà che el dragh, mitegh animal d aiva el poeudeva addattass ben a on clima de litton, come quell padann antigh, viduu che proeuppi chi ghe seven i ziviltà zelto-ligur d i palaffitt.
El se dis che quest dragh chi de nomm Tarantasi el terrorizzava la region, el copava e el pacciava i s’cett (chi gh emm ona primma interpretazion de l omm mandaa giò da el Bisson) e che per quest el vegn mazzaa da el capstipett d i Viscont che l à adottaaa come sò emblemm, per regoeurdà l impresa. Questa chi l è ciarament ona leggenda, che la coincid anca cont el arsuass d el lagh lombard.
El Dragh Tarantasi
Dezisament pussee veritiera l è iscambi l ipottesis che la voeur el Bisson ona vipra adorada da i Langobard. Lor seven superstizios fess e mennaven a el coll d i angiuss a forma de vipra azzurra in qualità de animal totemegh (forsi cont el reciappà anca el serpent de bronz issaa da Mosè in d el desert per guarì i sgiudee sganazzaa da i rettii d el desert inviaa da Dee come castigh).
El par poeu che quest simbol chi l è passaa a el commun de Milan e da li l è staa ciappaa da i Viscont che l ann faa come emblemm proeuppi.
In d l accezion langobarda la bissa l ariss on significaa positiv, de terra, da la che la vida la butta iscambi de vess desfada. Quest chi l è on ciar simbol d ispirazion matriarcala che el vid in d la Mader Terra, la Dea Mader, l orisgin de la vida, vida che da lee la nass e da lee la retorna.
On oltra ipottesis, suggestiva pussee che reala, la voeur iscambi che el Bisson l è on simbol oriental streppaa da el capstipett d i Viscont, Otton, durant i Crosaa a on “infidel”, copaa in combattiment, “infidel”, fignii poeu in d el emblemm, tra i dent d el serpent per simboleggià la vittorria d i Viscont in su i musulmann.
In effett in d i rappresentazion e descrizion araldegh, la compar ona figura umanna descrivuda come “morr” e pu come s’cett roeuso e a quest punt chi la poeudariss vess ona soraposizion de l impresa milanesa in d l inscì ciamada Terra Santa, scitada anca da el Giusepp Verd in d el sò bran “Oh Segnoo d el tecc nativ”de l oeuvra ” I Lombard de la primma Crosada”.
Proeuppi chi l appar interessanta la similitudin che ghe tra la leggenda d el Dragh Tarantasi e la leggenda d el San Giòrg. Anca seconda questa leggenda chi, ambientada però in Liban, el cavaiee San Giòrg l è riussii a desconfigg el terribel dragh che l infestava i aicch d el lagh, cont el salvà inscì da el dansger i abitant locai. La situazion la se fa anmò pussee suggestiva se pensom a el faa che el Bisson d i Viscont e la Cros d el San Giòrg inn d i simboi strettament ligaa a i Lombardii, a i Viscont e a l Insubria in primis.
La figura guerrera d el San Giòrg, inscì come quella d el San Mighel, veneraa anca lu da i nòster Vegg Langobard (per i che la soa figura la se conzilliava ben cont quella de Odin), la rappresenta vunn d i esempi de armonega fusion tra element pagann e cristiann, e naturalment el se poeud dì l istessa robba in su el Bisson d i Viscont istess; da ona part simbol Langobard de orisgin paganna e da l oltra simbol d i crosaa lombard che desconfiggen el semita in battasg.
Se restom fidei a l ipottesis langobarda, l omm tra i sò dent el poeudariss ancasì ben vess on simbol de terra che el nass, nepunemanch che l ipottesis d el Morr tegnuu tra i dent, a rappresentà la vittorria personala d i Viscont in Palestina, l à el sò incant.
Fresch d el Tarantasi in d la gesa d el San Giòrg in Lemine a Almen San Salvador.
On ultemma ipottesis interessanta, teorizzada da on quai de ambient insubrizist, la vid in d el Bisson d i Viscont on reciam a quii antigh dragh infolzii d aria e issaa in scimma a ona lanza, che vegniven dovraa come bannee da d i poppoi germanegh ma anca iranegh, soratutt arent el limes ; el poeudariss anca vess che in Pannonnia, in dova i se troeuvaven primma de debordà in Pianura Padanna, i Langobard s inn approeupriaa de quest simbol chi e l ann mennaa in eredità a Milan, in dova poeu el sariss vegnuu emblemm comunal e emblemm d i Viscont.
El Bisson l è on animal totemegh, langobard, passaa poeu a el commun de Milan e a i Viscont, che en ann faa come stemma proeuppi ( semper dovraa però da Milan da i Sfòrza a el Lombard-Venett, cont el fignì poeu de rappresentà ambett commerziai, pubblizitee e sportiv milanes).
La Bissa milanesa la conserva a distanza de secoi el sò segutant incant e la vidom come simbol ideal a rappresentà la Lombardia etnega (contramettuda a el Trivenett, idest a quella che l è stada Ostria Langobarda, el simbol pussee important de la che a nivell storregh l è el Leon de San March), insemma a l Agla imperiala de rettagg latinn-germanegh. D el rest el vessili Ducal d i Viscont l è caratterizzaa da quiist duu simboi chi inquadraa in d ona bandera bianca-orrada e recovrall l è segurament on degn tribuu in d i confront de chi che ann mettuu i bas de la moderna Lombardia e che ann faa de Milan la sò capitala, idest la zittà prinzipala de l Itaia de Mezzanocc.
On bannee, senza dubbi, meioo de la bandera ottuala verda cont roeusa camunna bianca, la che banalizza on simbol camun nobbil fess, per numm rappresentaa mei da el svastika che la reciappa on real desegn de plocch (Carpene) de ciar rettagg solee indoeuroppee.
Pol Sizz
Lissander Cavall
