A la lumm d el recent e definitiv cambiament de la Liga Nòrd in sens “taianista”, e d el consequent partasg d i “dur e pur” restaa fedei a l independentism, che soluzion la poeudariss vess giusta? Viduu che soven e volentera el se confond el termen “staa” cont el termen “Nazion”, numm credom che l è mia proeupriament corresgiuu limetass a el contramettess d i dò fazion sorascitaa. Da l oltra part iscambi, coma i fann vidè i event in Catalogna l independentism fin a s istess l è ben poeugh utel, perchè l è assee ingenov sperà che i ent soranazionai poeuden favorì el partasgiass d i staa d el Vottzent de l Oeuroppa de Sira, inscì coma l è ingenov pensà che i staa istess de rettagg giacobin, poeuden conced d i referendum per l independenza, soratutt se el se tratta de territorri economegament produttiv.
La soluzion, donca, la sariss de ciappà conscenza in sens nazionalista, ma mia cont l esaltà on inesistent e vunegh poppol taian da i Alp a la Sizilia, bensì etnonazionalista, cont el vidè la Lombardia per quell che l è, idest ona etno-nazion che la gh à semper vu el roll de pont tra el Mediterranee e l Oeuroppa Zentrala (cosa che el revarda ancasì ben el Nord-Est reto-venetegh), plasmada da l identità gallo-italega e langobarda.Anca se i problemm de tipp econommegh gh ann mia de vess trascuraa, i temp incoeu inn per primma robba maduu per on identitarism alpino-padan in ciav communitaria, identitarism che l è staa a longh margenalizzaa da l istessa Liga Nòrd, la che l à preferii vegnì in tuscoss part d el sistem Itaia.
Forsi quella che numm semm adree a proponn l è mia ona strada che la menna a soluzion prategh in d l immediaa present, ma l è ancasì ben utòpegh e insensaa pretend de poeud fondà ona nazion, cont el basass domà in su reson fiscai, cont el considerà anca che la Liga Nòrd in d i ultemm 30 agn, in quest sens chi,l à fallii miserament.
